Hver segir satt?

Er Fríkirkja samasem merki um að fara ,,frjálslega" með sannleikann? Stundum blasir það við að allar kirkjur telja sig boðbera sannleikans og svo virðist sem hann sé bara settur í mismunandi umbúðir en kjarninn er samt alltaf hinn sami.

Við flöggum Biblíunni og svo leggjum útaf biblíutextanum á okkar hátt og allir virðast hafa á réttu að standa því sannleikurinn er afstæður, ekki satt! 

En er það svo? Skoðum þetta

Ein setning í Biblíunni, stutt og alvarleg, er svona:..,,enginn kemur til Föðurins nema fyrir mig"!(Jóh.14:7)

Er setningin dæmi um hrokafulla kirkju eða þröngsýni postulanna? Ég leitaði í ýmsa texta hinnar íslensku Biblíu. Þar segir í ( Viðeyjarbiblíu 1841)þar er setningin eins. Í Stjórn (1976, stofnun Árna Magnússonar) segir: ,,Engi comr til faudor nema fyr mic"! Þessi texti er forn Norrænn. Hvernig skyldi Oddur Gottskálksson (1540) hafa þýtt þennan Biblíutexta? Svona:,,Enginn kemur til míns föðurs nema fyrir mig."

Textinn virðist skila sér eins frá því um 1200 til okkar daga. Það segir mér að menn hafi verið sammála um túlkun og þýðingu taxtans úr grískum frumheimildum í 800 ár!

Skoðum umdeilda texta sem mér er tjáð að ég hafi misfarið og rangtúlkað. Vegna Hinsegin daga eru þessir textar dregnir fram í umræðuna hjá Fríkirkjunni við Tjörnina.

Efnið er frá 1.Kor. 6:9 en þar segir:,,Hvorki munu saurlifismenn né skurðgoðadýrkendur, hórkarlar né kynvillingar, þjófar né ásælnir, drykkjumenn, lastmálir né ræningjar Guðs ríki erfa" (Bibl. 1981).

Þýðingin frá Oddi(1540) er svona:,,Því villist eigi að hvorki frillulífismenn né blótmenn skurðgoða, eigi hórdómsmenn né sælgætingar, eigi heldur þeir sem skömm drýgja með karlmönnum, eigi þjófar né ágirndarmenn, eigi ofdrykkjumenn, eigi hneykslarar né ræningjar munu Guðs ríki eignast."

Og Viðeyjarbiblían frá 1841:,,dragið yður eigi sjálfa á tálar; hvorki frillulífsmenn, né  skurðgoðadýrkarar, né hórdómsmenn, né mannbleyður, eður þeir sem leggjast með karlmönnum, né þjófar, né ásælnir, né drykkjumenn né orðhákar, né ránsmenn munu Guðs ríki erfa."

Skyldi þessi texti einnig vera til í Stjórn frá Stofnun Árna Magnússonar frá 1976? Þar segir:,,Eigi mego hordóms meN eignasc ríke guþs...eigi mego hordómsmeN ne saurlifess meN ne bla/ter meN eignast rike guþs.

Ef þýðendur fyrri alda voru svona sammála um innihald hins forna gríska texta af hverju eru menn inná því í dag að þetta séu allt saman miskildar ritningargreinar?

Fríkirkjan við Tjörnina stígur fram með þeim rökum að menn hafa viljandi barið Samkynhneigða með Biblíunni vegna þessa ,,misskyldu texta" ritninganna! Það skyldi þó aldrei vera að þessi afstaða Fríkirkjunnar sé opinberun á þeirra eigin rangtúlkun? 

Jesaja segir við okkur um þann anda sem talar að ef hann tali ekki samkvæmt þessu orði hafa þeir engan morgunroða (þá er ekkert ljós í þeim?).

Nútíma túlkun guðfræðinga Fríkirkjunnar er varla æðri en Guðfræði fyrri alda sem þýddu Bibíutextana síðustu 800 ár í samhljóma.

Niðurstaðan er einföld. Frikirkjan er villutrúarsöfnuður með falskenningar að leiðarljósi og boða annan Jesú en Biblían og postularnir boðuðu.

Það er því eðlilegt að við væntum þess að Guð sjái um málið og fari sínum höndum um villukennarana við Tjörnina. Trúlega er það best líka því hjá honum, Guði er miskunn að hafa!

Snorri í Betel


Heilbrigð sál á skotæfingu?

Af misjöfnu þrífast börnin best. Sumt sem þau taka sér fyrir hendur flokkast undir óhollustu og slæman lífsstíl. Skotfimi er ekki þar á meðal. Ég gekk til liðs við Skotfélag Reykjavíkur 1970 þegar gjaldkerinn var Ári V. Atlason. Ég hef ekki verið virkur félagi undanfarna áratugi og ræðst það helst af búsetu minni utan höfuðborgarsvæðisins. En skotveiðar hafa verið stundaðar í gegnum árin, bæði svartfugl, Skarfur, rjúpa, gæs og hreindýr hafa verið lögð að velli á skjótan og sársaukalausan hátt. 

Ég hreifst snemma af skotfimi og stundaði veiðar. Til að fella dýr eða fugla var nauðsyn að vera hittinn. Í veiði vilja menn alls ekki særa dýr og margskjóta eða hlaupa eftir þeim helsærðum heldur fella þau kvalalaust og snöggt. Til að svo megi verða þurfa menn æfingasvæði.

Ég gladdist yfir þessari frétt, að nýju má skjótast úti á Álfsnesi og æfa skotfimi. Stilla sjónaukana á rifflum og viðhalda færninni að hitta vel þegar til kastanna kemur..

Fólkið sem ég hef kynst í þessum geira er ekki hættulegasta fólk og morðóðasti lýður. Þetta er fólkið sem fer mjög varlega og gætir þess vel að ógna engum eða verða öðrum til ama.

Þeir sem læra að umgangast byssur hafa sýnt það að slys af völdum skotvopna á Íslandi eru hverfandi. Því segi ég að byssan er ekki endilega hættuleg, það er maðurinn með rangt hugarfar sem er hættulegur hvort sem hann ber hníf, byssu, kylfu eða band.

Ég gladdist því yfir opnun skotsvæðisins á Álfsnesi að nýju og ætla að fá að njóta þess. Endurnýja skráningu mína í Skotfélag Reykjavíkur og njóta þess að heilbrigt fólk á höuðborgarsvæðinu fái að hittast við æfingu, undirbúning veiða og góð vináttu.

Það hlýtur að vera eitt eðlilegasta sport í veiðimannaþjóðfélagi að ungt fólk fái aðgang og áhuga á veiðum, byssum og náttúruvernd. Því þetta fer saman. Enginn heilbrigður veiðimaður drepur til að útrýma.

Vinur minn sótti um byssuleyfi á unglingsárum sínum hjá sýslumanni í okkar heimabæ. Sýslumaðurinn spurði hvað hann vildi með byssu, hvort honum þætti nú ekki vænt um litlu fuglana? ,,Jú" svaraði vinur minn, ,,mér þykir svo vænt um þá að ég vil ekki borða þá lifandi"! Syslumaður hafði ekki frekar orð á þessu, skrifaði nafn sitt á byssuleyfið og síðan hefur handhafi byssunnar ekki gert flugu mein en bæði gæsir, sjófuglar og sauðfé hafa fengið skjótan dauða hjá viðkomandi.

Það er frá Guði komið að við megum nýta okkur dýrin sem fæðuog því Guði þóknanlegt að við förum rétt að með sem sneggstum hætti.

Til hamingju að hafa opnað Skotæfingasvæðið á Álfsnesi.

Snorri í Betel


mbl.is Skotvöllur í Álfsnesi fær nú nýtt starfsleyfi
Tilkynna um óviðeigandi tengingu við frétt

Ritarinn ruglar!

Ritarastarfi hefur gjarnan fylgt mikil ábyrgð og vald. Ritarar kommúnistaflokksins í Rússlandi réðu för. Þeir réðu hvað ritað var og höfðu ,,sannleikann í höndum sér"!

Biskupinn yfir Íslandi hefur líka sinn ritara. Hann sendi frá sér hin furðulegustu skrif og engu líkara en að hann einn fái að ráða trúarviðhorfum þjóðkirkjunnar og kynna þau án nokkurra athugasemda frá biskupi.

Í dag(2.ág.´22) birtist Guðfræði og opinberun biskupsritara þar sem hann lýsir Jesú Kristi. Hann hefur svo sem gert það áður á sinn furðulega hátt og í dag sagði hann Jesú vera:,,trans, homma,fjölbreytilegan"!

Þessi kynning á Jesú Kristi er í mikilli mótsögn við kynningu guðspjallanna og kristninnar á þessari persónu hreinleikans og sannleikans.

Páll postuli fór ekki í neinar grafgötur með það að rétt kynning á Jesú Kristi er grundvallar þáttur í trúnni á hann. Svo ákveðinn var postulinn í því að varðveita rétta framsetningu á Frelsaranum að hann sagði við Korintusöfnuðinn í öðru bréfinu til hans og kafla 11:4:,,Því að ef einhver kemur og prédikar annan Jesú en vér höfum prédikað eða þér fáið annan anda en þér hafið fengið eða annað fagnaðarerindi en þér hafið tekið á móti þá umberið þér það mætavel." Svo eilítið síðar í sama kafla v.13:..því að slíkir menn eru falspostular, svikulir verkamenn, er taka á sig mynd postula Krists."

Það er ábyrgðarhluti að kynna Jesú Krist og eins gott að fara rétt með hver hann er. Hann er Sonur Guðs og karakterinn slíkur, óaðfinnanlegur enda fann Pílatus enga sök hjá þessum manni Páskalambið þurfti að vera gallalaust. Það var Jesús Kristur bæði sem maður, páskalamb og frelsari.

Hinn lýtalausi maður og hin fullkomna fórn var ekki syndari, þjófur, hórkarl, hommi eða trans. Hann var gerður að synd okkar vegna, vammlaus maðurinn.

Ef biskupsritari fer í fjölmiðla með staðlausa stafi um frelsarann Jesú Krist og boðskap Fagnaðarerindisins um Guð almáttugan þá er hann ekki starfi biskupsritara vaxinn. Hann hefur tvo möguleika 1. að leiðrétta rangfærslur sínar og kynna Biblíumyndina rétta eða 2. að segja af sér og sinna öðrum störfum sem falla honum betur.

Ábyrgð hans kemur fram í Galatabréfi Páls þar sem hann kynnir Fagnaðarerindið og mikilvægi þess með þessu orðum:..En þótt jafnvel vér eða engill frá himni færi að boða yður annað Fagnaðarerindi en það sem vér höfum boðað yður, þá sé hann bölvaður" ! (Gal.1:8)

Af hverju vill biskupsritari vera bölvaður? Guðfræðimenntaður maðurinn virðist ekki skilja að Guð Gamlatestamentisins og Guð Nýjatestamentisins er einn og hinn sami Guð. Hann veitti okkur syndugum mönnum, sonarrétt fyrir trú á Son hans Jesú Krist. Það er breytingin frá Gamla- í Nýja-testamentið. Jesús er eina leið mannsins úr ógöngum syndarinnar hvort sem þær ógöngur nefnast hommi, trans, þjófur, hórdómur, fíkill eða hvað það nú er sem nefnt er á lastalista Biblíunnar (1.Kor.6:9-10)!

Við getum haft svo sem okkar skoðun og álit á málinu en gleymum því ekki að Guð hefur líka skoðun og álit á málinu! Biskupsritari á að kynna álit Guðs fyrir þjóðinni, það er hlutverk kirkjunnar að standa með Guðs álitinu í æboðskap sínum. Ef Biskup og prestar stíga ekki fram til að leiðrétta rangfærslur þær sem koma frá biskupstofu um Jesú Krist þá viti þjóðin að þjóðkirkjan er ekki kristin. Hún getur haft sumt kristilegt í sínum verkum en hún boðar annað Fagnaðarerindi og annarlegan Jesú. Þú ,kæri lesandi, sem ert annt um Fagnaðarerindið og trúir á hinn Biblíulega Jesú farðu úr Þjóðkirkjunni svo að þú hreppir ekki dóm Guðs sem gegnur yfir þá stofnun. Bölvunin kemur yfir þá sem guðlasta Jesú og frelsisverki hans. Þú átt að erfa blessunina, vertu réttu megin.

Snorri í Betel


Mannslíf í húfi!

Mig rak í rogastans þegar sócíalistarnir á Fréttablaðinu stigu fram í gær( 28.06.22) með kröfuna að virða rétt kvenna að eyða fóstrum. Ekki batnaði líðanin þegar ég las eftir hinn sprenglærða guðfræðing, Örn Bárð, pistilinn um niðurstöðu hinna sprenglærðu guðfræðinga að sjálfsagt væri að virða rétt kvenna til fóstureyðinga/ þungunarrofs.

Pennarnir í Fréttablaðinu, Björk Eiðsdóttir og Þórunn Sveinbjarnardóttir komu víða við og beittu spjótum sínum að Donald Trump, Clarence Thomas, öfgasinnaðri bókstafstrú, dómurum og stjórnmálamönnum sem hirða ekkert um ,,nauðganir, sifjaspell eða heilsu kvenna"! Ja, ljótt er það.

En ég velti því fyrir mér hvort líf fóstursins sé ekki mannslíf? Við þekkjum sögu sócíalistaflokksins í Þýskalandi sem flokkaði líf sumra sem ,,untermench" en annarra í ,,übermench". Untermench voru send í gasklefa eða gerðar allskonar tilraunir sem við viljum helst ekki heyra af og eru Þjóðverjum enn í dag þungur ljár í þúfu. Guðfræðingurinn Örn Bárður leggst á árarnar með þessari undarlegu heimspeki og gefur henni ,,guðfræðilega og akademiska" stöðu.

Eru fóstur ekki börn? Lengi var talað um ófrískar konur sem barnshafandi. Er sjálfsagt að eyða og fjarlægja barn eða fóstri úr barnshafandi konu. Er þá ekki verið að eyða mannslífi?

Nú ætla ég að vísa til Guðfræðinnar og gæti Örn Bárður hinn akademiski guðfræðingur borið þessi orð úr Davíðssálmi saman við sína útleggingu á þungunarrofinu.

Í Davíðssálmi 139 segir:

,,Því að þú hefur myndað nýru mín, ofið mig í móðurlífi. Ég lofa þig fyrir það að ég er undursamlega skapaður, undursamleg eru verk þín, það veit ég næsta vel.

Beinin í mér voru þér eigi hulin þegar ég var gjörður í leyni, myndaður í djúpum jarðar.

Augu þín sáu mig er ég enn var ómyndað efni, ævidagar voru ákveðnir og allir skráðir í bók þína, áður en nokkur þeirra var til orðinn."( versin 13 - 17)

Hvað líst mönnum? Er verið að tala um litla mannveru eða bara frumuklasa sem er að eyðileggja líkama konunnar/móðurinnar? 

Þegar Guð fylgist svona með framvindu barns í móðurkviði er það ekki vegna þess að Guð elskar að sjá framvindu mannlífsins? Kynslóðirnar koma og fara. Er í lagi að stöðva framvindu lífsins í nafni kvenréttinda?

Þórunn nefnir nauðganirnar og sifjaspellin sínu máli til stuðnings. Eru þær réttlagingin fyrir 1100 - 1400 fóstureyðingum á ári? 3-4 á dag!

Sálmaskáldið heldur áfram og lætur ,,fóstrið tala" í móðurlífi þegar kemur að versi 19 í þessum Davíðssálmi. Þar segir:

,, Ó að þú Guð, vildir fella níðingana. Morðingjar! Víkið frá mér."

Hér er verið að ávarpa, Sr. Örn Bárð Jónsson, Þórunni Sveinbjarnardóttur, þingkonu Sócíalistaflokks Samfýlkingarinnar og Björk Eiðsdóttur talskonu þungunarrofs og fóstureyðinga í Fréttablaðinu. Er það réttlætanlegt að þessi snepill fái að fara inná heimilin með þennan haturs boðskap? Er ekki rétt að lögreglan skoði þennan miðil sem er gegnumsýrður af hatursorðræðu?

Sjá menn ekki að þau þrjú krefjast þess að mannslífum sé eytt og það í nafni kvenna, mæðranna sem skaffa okkur börn, framtíðar Íslendingum og nemendum sem fylla skóla landsins?

Mætti ég biðja um lífvænlegri penna og Guðfræðinga hér á landi. Hafi þessi 3 sem ég nefni skömm fyrir þeirra vondu orð.

Snorri í Betel


Auðvitað verða hér hryðjuverk!

Við þurfum ekki að leita langt aftur til að sjá að ýmislegt óæskilegt gerist á Fróni.

Hvað gerðist 17.júní vestur á Nesi? Fréttum ber saman um að tveir hafi verið lagðir á sjúkrahús eftir að hafa verið barðir með hamri og haka. Annar er kominn heim með sár en hinn liggur höfuðkúpubrotinn á sjúkrahúsi. Sá man ekki eftir árásinni en hinn segir að gerandinn sé Múslimi og hrópaði ,,Allah akbar" og lét síðan höggin dynja á samstarfsmönnum sínum. Var þetta hryðjuverk?

Hefðu þeir sem urðu fyrir árásinni verið í Samtökunum 78 eða stundað lífnað eins og þar tíðkast, væri þá árásin flokkuð sem hryðjuverk?

Fréttaflutningurinn er varfærinn til að við sjáum síður hryðjuverka ógnanirnar sem eru um alla álfuna, hingað komna!

Menn bentu Eygló Harðardóttur þá ráðherra Framsóknar að það væri eðlilegt að bjóða kristnum Sýrlendingum skjól í þessu landi, þeir væru nær okkur í hugsun, siðferði og gildum. En hún vildi fjölmenningu og bauð Múslimum og það er mjög erfitt að henda reiður á fólki sem elst upp við Sharíalög en þurfa að sætta sig við löggjöf setta af mönnum jafnvel guðleysingjum. Sem betur fer hafa flestir Múslimirnir verið okkur hagstæðir og ljómandi gott fólk.

En svo höfum við Albana sem skutu mann með köldu blóði og annan sem ók niður mann og svo þá sem hentu félaga sínum fram af svölum í Úlfarsárdal. Eru þetta dæmi um hryðjuverk eða bara glæpaverk, jafnvel óviljaverk? Það ræðst eftir því hvernig málin eru vaxin og hvaða upplýsingar við fáum frá gerendunum.

Getum við forðast hryðjuverkin? já, en til þess þurfum við að feta rétta veginn!

Biblían segir: ,,Ofbeldið rís upp sem vöndur á ranglætið"! (Esek. 7:11) Er þjóðfélagið okkar réttlátt? Eru ekki fjölmiðlar einnig að gæta fréttaflutnings svo að við komumst ekki að þeirri niðurstöðu að hryðjuverk eru framin hér á landi? Ekki megum við kenna saklausum manni um hryðjuverk eða glæp bara af því að hann kemur frá Albaníu, Sýrlandi eða Afganistan. En við megum alveg gera okkur grein fyrir því að Islam virðir ekki það sem heitir Biblíuleg, gyðingleg eða kristin gildi.

Gætum þess hverju er hleypt inní landið. Hér er ekki réttlátt samfélag sem spyr um gömlu göturnar, hver sé hamingjuleiðin.(Jer. 6:16)

Snorri í Betel


mbl.is Ekki hægt að útiloka hryðjuverk á Íslandi
Tilkynna um óviðeigandi tengingu við frétt

Andlit kirkjunnar?

Mér kom eitt Biblíuvers í hug, frá spádómsbók Jesaja, kafla 3 og vers 9:

,,Andlitssvipur þeirra vitnar í gegn þeim, og þeir gjöra syndir sínar heyrinkunnar, eins og Sódóma, og leyna þeim ekki. Vei þeim, því að þeir hafa bakað sjálfum sér ógæfu."

þarf ekki kirkjan að gera sér grein fyrir því hvað hún stendur fyrir? Á hún ekki að vera rödd Guðs í samtímann? Þess Guðs sem er ,,í gær, og í dag hinn sami og um aldir"!!!

eins gott að kynnirinn fari ekki útaf og klúðri ,,Faðirvorinu"!
snorri í Betel


Hver er ekki ,,bókstafstrúar"?

Orðið ,,bókstafstrú" er gjarnan framsett á neikvæðan hátt eða um þá sem skal forðast. Öfgar og Bókstafstrú haldast í hendur til eyðileggingar frjálslyndi og ,,víðsýni"!

Í ljósi páskanna og allra þeirra atburða sem tengjast þeirri sögu er samt vert að athuga hvað ,,bókstafurinn" hafði mikið vægi hjá Guðspjallamönnunum og öðrum sjónarvottum.

Mattheus segir:

,,Þá rættist það sem sagt var fyrir munn Jeremía spámanns: Þeir tóku silfurpeningana þrjátíu, það verð sem sá var metinn á er til verðs var lagður af Ísraelssonum og keyptu fyrir þá leirkerasmiðs akurinn eins og Drottinn hafði fyrir mig lagt."!(Mt.27:9 - 10) Má segja að þetta hafi ræst ,,bókstaflega"?

Jóhannes tekur sama pól í hæðina í sinni frásögn. Hann segir frá klæðum Jesú: ,,Þegar hermennirnir höfðu krossfest Jesú tóku þeir klæði hans og skiptu í fjóra hluti og fékk hver sinn hlut. Þeir tóku og kyrtilinn en hann var saumlaus ofinn í eitt ofan frá og niður úr. Þeir sögðu því hver við annan: ,,rífum hann ekki sundur, köstum heldur hlut um hver skuli fá hann." Svo rættist ritningin: ,,Þeir skiptu með sér klæðum mínum og köstuðu hlut um kyrtil minn."(Sálm 22:19)

Enn fremur birtist mynd af ,,bókstafstrúuðum" krossfestum frelsara sem Jóhannes greinir svo frá:

,,Jesús vissi að allt var þegar fullkomnað. Þá sagði hann, til þess að ritningin rættist:,,Mig þyrstir"! (Jóh. 19:28)

Guðspjallamaðurinn Mattheus segir frá því þegar búið var að grafa Jesú að æðstu Prestarnir og farísearnir komu saman fyrir Pílatus og sögðu:

,,Herra, vér minnumst þess að svikari þessi sagði í lifanda lífi ,eftir þrjá daga rís ég upp"! (Mat. 27:62-63) Þeir bókstaflega tóku mark á orðum hans.

Ég get haldið áfram og bent á fleirri atriði sem er að finna í Biblíunni og fornleifar hafa leitt í ljós. Sannleiksorð ræðst nefnilega ekki af því hvort ég trúi þeim. Sannleikurinn er nefnilega ekki afstæður eða breytilegur. Hann er og varir -bókstaflega réttur!

Markús, Guðspjallamaður greinir frá orðum Jesú svona:

,,Jesús sagði þeim,,Mannssonurinn verður framseldur í manna hendur og þeir munu lífláta hann en þá er hann hefur líflátinn verið, mun hann upp rísa eftir þrjá daga." (Mark.9:31 )

Guðspjallamennirnir tefla fram sögulegum staðreyndum sem rökum fyrir því hver Jesús er.

Jesús virðist sjálfur hafa verið ,,bókstafstrúar". Það er nefnilega haft eftir Mattheusi að Jesús svaraði:

,,Hafið þér eigi lesið að skaparinn gjörði þau frá upphafi karl og konu og sagði, fyrir því skal maður yfirgefa föður og móður og bindast konu sinni og þau tvö skulu verða einn maður. Það sem Guð hefur tengt saman má maður eigi sundur skilja."(Matt. 19: 4 - 6)

Þannig er Jesús bæði á móti kynferðislegu sjálfræði og hjónaskilnuðum. Bókstafurinn stendur því óhaggaður.

Eru menn ekki líka ánægðir með að boðorðið ,,Þú skalt ekki stela" skuli vera túlkað sem óhagganlegt boðorð um eignarréttinn? Það merkilega er þó að í okkar ,,frjálslynda" þjóðfélagi þegar verið er að losa um allar siðferðilegar reglur þá er þrengt að lífeyrisþegum sem hafa lagt sína eign í lífeyrissjóðina og stjórnvöld takmarka stórlega réttinn til lífeyrisins. En mönnum er stefnt á Austurvöll til að skerpa á reglum sem varða þjóðareign okkar eins og bankana en kvótinn er utan sviga og bundinn milljarða hagkerfi útgerðanna. 

Það fólk sem mætti á Austurvöll heimtar ,,bókstafstrú" á heilbrigðar reglur samfélagsins. Er það ekki jákvætt?

Gleðilega páska

Snorri í Betel


Að vera ,,andstyggilegur"?

Þetta orð fer að vera sjaldgæft. Ég held að það heyrst aðeins hjá þeim eldri, samt er merking þess sterk og merkileg. 

Biblían notar þetta orð vegna hebresku sagnarinnar ,,tovebah". Sú sögn er notuð yfir ,,viðbjóðslegt", ,,hryllir við" og gjarnan í tengslum við rangt siðferði. Þegar setningin í Orðskviðum Salómons segir: ,,Sá er sekan sýknar og saklausan sakfellir, eru báðir Guði andstyggilegir" (Orð.17:15) þá er eðlilegt að við gaumgæfum þetta mál.

Hver vill falla undir það að vera metinn af Guði sem ,,andstyggilegur", eða ,,viðbjóðslegur"? Hver vill að Guð ,,hrylli við" honum/ henni?

Páska sagan um dóm og krossfestingu Jesú er einmitt sagan um mennina sem fundu enga sök hjá þessum manni en dæmdu hann samt til lífláts. Sagan er um lýðinn sem hrópaði:,,burt, burt með hann, gef oss Barabbas lausan" (Lúk. 23:18)

Hinn seki, Barabbas gerður saklaus, hinn saklausi, Jesús frá Nasaret sakfelldur. Fyrir bragðið urðu allir aðilarnir sem komu að þessari niðurstöðu ,,andstyggilegir"!

Að taka mark á Orði Guðs verður hverjum og einum til láns og blessunar. Það sem Guð segir að við megum skulum við gera en það sem hann varar okkur við og jafnvel bannar, skulum við ekki gera. Þannig byggist upp réttlætiskenndin og hin öruggu siðferðis viðmið. Enn í dag þurfum við að sjá muninn á réttu og röngu.

Páskarnir eru einmitt hátíðin til að skerpa á siðferðisviðmiðunum að ,,Hann sem var gerður að synd, okkar vegna" vegna brenglaðra viðhorfa samtímans hann var gerður að ,,frelsaranum, eina sem opnar þér leiðina inní eilíft líf"!

Hvernig metur þú stöðuna?

Gleðilega páska.

Snorri í Betel

 


Aðeins um ,,sértrúarsöfnuði"!

Þessu orði er viðhaldið hjá íslenskum blaðamönnum. Bjarni Randver skilaði áliti sínu á síðum mbl.is 5/4 sl. Og benti á skilgreiningar á þessum félagslegu fyrirbærum í hinum frjálsu vestrænu samfélögum. Ekki var betur séð en að þeir sem tilheyrðu ekki ríkisreknu kirkjunni máttu gjarnan glíma við þann vanda að vera ,,skrímslavæddir“ og settir á jaðar samfélagsins. Það er fráhrindandi staður.

Ólína Þorvarðardóttir ritaði grein í Lesbók Mbl. 1992 um ,,sértrúarsöfnuðina“ á Íslandi og þar segir: ,,Eða hvers vegna halda menn að sértrúrahópar og söfnuðir utan þjóðkirkjunnar standi svo vel að vígi um þessar mundir? Það er vegna þess að þeir laða til sín þá einstaklinga sem samfélagið hefur hafnað“! Þessir söfnuðir eru þá skjól fyrir vindi, áningarstaður á grýttri leið.

Árið 1987 birtist grein í Tímanum sem hét: ,,Vakning á Grensási og sértrúarhóparnir sem klofnuðu þaðan.“ Þaðan kom hópurinn ,,Ungt fólk með hlutverk“, ,,Trú og líf“, ,,Vegurinn“ og ,,íslenska Kristskirkjan“! Þá voru þessar kristnu fríkirkjur flokkaðar sem ,,sértrúarhópar“ í málgangi Framsóknarmanna.

Ellert Scram ritaði leiðara í DV eftir fyrstu heimsókn Benni Hinn hingað til lands. Samkoman var haldin í Kaplakrika og mættu 5000 manns á svæðið og Ellert sagði: ,,Vestur í Bandaríkjunum reka margvíslegir sértrúarsöfnuðir sérstakar sjónvarpsstöðvar..“ Engin þjóðkirkja er þar til staðar. Þeir hafa á sér mynd Krists, hjálpa, hafa samstöðu og óbugandi útbreiðslukraft. Þeir kalla ekki ríkisvaldið til stuðnings ef þá langar til að efna til 5000 manna samkomu eins og í Kaplakrika. Hvernig horfir þjóðin á þessa frjálsu söfnuði? Þeir eru kallaðir ,,Sértrúarsöfnuðir“ í blöðunum og daglegu tali. Getur verið að í augum Íslendinga séu þeir eins og ,,Musteri Sólarinnar“ eða Waco, eða hinn japanski Asahara svo eitthvað sé nefnt?

Þessir hópar eru þá flokkaðir í okkar samfélagi sem ljúfar hjálparstofnanir og vörn lítilmagnans eða beint afsprengi Kölska úr hinu neðra.

Við hverju má búast? Við erum greinilega stödd í fjandsamlegum heimi! Jesús varaði sína lærisveina við almenningsálitinu í Fjallræðunni. Þar segir: ,,Sælir eruð þér þá er menn atyrða yður og ofsækja. Og tala ljúgandi allt illt um yður min vegna. Verið Glaðir og fagnið því að laun yðar eru mikil í himnunum; Þannig ofsóttu þeir spámennina sem voru á undan yður!“ (Matt.5:11- 12)

Eru blaða – og fréttamenn sekir um lymskulegan áróður þegar þeir spyrða saman frjálsar kristnar kirkjur við eyðandi ,,sértrúarsöfnuði“?  Ef til vill má segja að hin sanna Kristna kirkja verði ávallt talin til ,,sértrúarsafnaðarar“ með líkum hætti og gert var við stofnanda hennar, Jesú Krist, hann var krossfesstur milli tveggja ræninga og ,,með illræðismönnum talinn“! Táknrænt að fylgjendur hans fá sömu fjandsamlegu afstöðuna frá heiminum, 2000 árum síðar.

Biblían segir: ,,..Vitið þér ekki að vinátta við heiminn er fjandskapur við Guð“! (Jak.4:4).  Við heyrum hvað um okkur er sagt sem reynum að fylgja Jesú Kristi og sjáum að baráttan við lygina, blekkingaröflin og falsfréttirnar stendur enn! Látum umræðuna ekki koma okkur á óvart, þolum og þreyjum því launin bíða okkar á himnum en hinn fallni heimur mun aldrei verða vinur okkar, skjól eða stuðningsaðili.

Snorri í Betel


Viðreisn og dómsdagur!

Þingflokksformaður Viðreisnar fór mikinn í lok mars á síðum mbl og DV (mbl 29.mars og DV. sama dag). Ekki má annað skilja en að hún saknaði þess að ,,Hamfaraspár" hafi ekki ræst þau 15 ár sem ,,frelsisbarátta" samkynhneigðra ,,hjó að rótum" samfélagsins og hjónabandið færi á öskuhauga sögunnar.

Oftar en ekki þá tölum við um ,,dóm Guðs" af mikilli vanþekkingu og jafnvel á spaugsaman hátt. Langar mig því til að benda á nokkur atriði sem eru áleitin í samhengi sögunnar og hvort ekki megi sjá alvarleikann í samtímanum.

Hamfaraspár eru ekki dómsdagur. En Hamfarir eru þrengingar, vondir og erfiðir tímar sem verða okkur mótdrægir.

1. Guð hefur þegar dæmt samkynheigðan lífsmáta. Sagan um Sódómu og Gómorru er einmitt staðfesting á því. Þá var maðurinn kominn í mótstöðu við almáttugan Guð og hlutverk kynjanna að búa til afkomendur. Það var og er Guðs áætlun að börnin fæðist og taki við. Sódóma og Gómorra fengu ,,Dómsdag"! Syndir þeirra voru dæmdar og kom dómurinn niður á þeim.

2. Kristin trú útlistir vel í fyrsta kafla Rómverjabréfsins afleiðingarnar sem verða vegna okkar eigin ákvarðana í andstöðu við vilja og áætlun Guðs með sköpunina. Þar segir:

,,Þess vegna hefur Guð ofurselt þá fýsnum hjartna þeirra til saurlifnaðar, til þess að þeir svívirtu líkami sína hver með öðrum." (Róm. 1: 24)

,,Þess vegna hefur Guð ofurselt þá svívirðilegum girndum. Bæði hafa konur breytt eðlilegum mökum í óeðlileg og eins hafa líka karlar hætt eðlilegum mökum við konur og brunnið í losta hver til annars, karlmenn frömdu skömm með karlmönnum og tóku út á sjálfum sér makleg málagjöld villu sinnar." (Róm 1: 26-27)

Hefur þetta birst í okkar samfélagi?  Köllum við þetta frelsi sem ,,engan skaðar" og ,,mannréttindi".

,,Þar er þeir hirtu ekki um að varðveita þekkinguna á Guði, ofurseldi Guð þá ósæmilegu hugarfari svo að þeir gjörðu það sem ekki er tilhlýðilegt, fylltir allskonar rangsleitni vonsku, ágirnd, illsku, fullir öfundar, manndrápa, deilu, sviksemi illmennsku." (Róm 1:28)

Þarf að segja meira? Sjá menn ekki þessa þætti ofanjarðar í okkar samfélagi? Mannlífið hefur nefnilega ekki lagast við meira frelsi. Meira að segja formaður Viðreisnar er inní þessum pakka og formaður þingflokks Viðreisnar sér það ekki!

Má minnast á #metoo, lauslæti unglinga undir 15 ára aldri, fjúkandi toppa fyrirtækja vegna sögusagna um óviðeigandi snertinga á starfstúlkum fyirtækja?

3. ,,Hamfaraspár"! Af hverju er þetta orð valið? Aldrei fyrr í Íslandssögunni höfum við talað um ,,Hamfarahlýnun"! Er þetta einhver tilviljun að á undaförnum 15 árum hafa áhyggjur vaxið stórlega varðandi hlýnun andrúmsloftsins, bráðnun jökla og breyttrar náttúru að ríkisstjórn og löggjafinn eru að setja á landslýð nýja skatta og aukin útgjöld til að bjarga náttúrunni og búsetu á okkar landi. Það vita allir að CO2 í andrúmsloftinu er fæða grænna jurta og frumbjarga lífvera í yfirborði sjávar. Náttúran sér um sig sjálf nema Guð breyti starfseminni!

Fyrst þingflokksformaðurinn kvartar yfir að 15 ára gamlar hamfaraspár hafi ekki ræst mitt í miðri ,,Hamfarahlýnun" þá er mér spurn, ertu blind og/eða heyrnarlaus? Má ekki spyrja þá í beinu framhaldi um það hvort þingstörfin og löggjöfin verði ekki sama marki brennd?

Svo segir hún á mbl.: ,,Þau sem harðast sækja fram gegn trans fólki kæra sig hins vegar ekkert um lærdóm sögunnar.."!

Hver er lærdómur sögunnar? Er hann virkilega enginn? Við höfum sögulegar heimildir fyrir því að fólk sem fer gegn náttúrulögmálunum verða sér og öðrum að skaða. Náttúran vinnur gegn öllum og stærri þjóðfélög en okkar sem féllu áður í siðlausan lífsmáta hurfu af sjónarsviðinu. Það þarf ekki mikið að gerast svo að íslensk þjóð hverfi á 50 árum! Hvað mun valda því? Okkar eigin verk, ákvarðanir og löggjöf.

Meðan þingmenn ganga um með glíju í augum yfir velgengni samkynhneigðar og trans fólks án þess að setja það í samhengi við sögu mannkyns þá stöndum við á bjargbrún hrunsins.

Í Gíslasögu Súrssonar (10.öld) er að finna frásögn um galdraiðkun, ergi og skelmiskap. Það varð til þess að gerandinn var grýttur af Gísla. Ekki þótti í lagi að raska ,,jafnvæginu í náttúrunni" með slíku athæfi.(Skelmiskapur og ergi eru gömul heiti yfir kynvillu.) Fordómar?

Í Speki Salómons( 3.öld f.kr.) er talað um menningarhrun fornaldar og þar segir um refsidóma yfir Egypta: ,,Í ranglæti sínu höfðu hugsanir þeirra verið fávíslegar og leitt í þá villu að dýrka skynlaus skriðdýr og auvirðilegar pöddur. Þess vegna sendir þú þeim mergð skynlausra kvikinda til þess að refsa þeim og kenna þeim að það sem þeir nota til að syndga verður þeim til refsingar." (Speki Salómons 11: 15). Er þetta ritað vegna fordóma? (Hamfarir komu upp í landinu.)

Að vísa til sögunnar leysir okkur ekki undan ábyrgð. Mannkynssagan sem er eldri en 15 ára lyfta undir ,,Hamfaraspár" og gefa okkur ekki rúm til að skensa þá sem hafa varað við að samþykkja þennan trans-lífsmáta eða samkynhneigð, sem fáfróða og/eða fordómafulla.

Jeremía spámaður (6.öld f.kr.) segir: ,,Misgjörðir yðar hafa fært allt þetta úr skorðum og syndir yðar hafa hrundið blessuninni burt frá yður." Svona er SAGAN - miklu eldri en 15 ára!

Fyrir alla er málið varðar: Guð er ennþá til og við stjórnvölinn!

Jesús Kristur og hann eru alltaf sammála. Þeir veita mönnum rétt og sönn mannréttindi. Jesús Kristur nefndur til sögunnar sem FRELSARINN! Virðum hann þá getur Viðreisn átt sér stað á þessu landi!

Snorri í Betel


« Fyrri síða | Næsta síða »

Um bloggið

Snorri í Betel

Höfundur

Snorri Óskarsson
Snorri Óskarsson

Er lífeyrisþegi og notar tímann til að fylgjast með Ritningunum rætast! Var safnaðarhirðir Hvítasunnukirkjunnar á Akureyri 2004 - 2018 og kennari í Brekkusóla frá 2001 til 2013.

Hef stundað kennslu frá 1973 á Vopnafirði. Gagnfræðaskóla Vestmannaeyja frá 1975, Barnaskóla Vestmannaeyja, Iðnskóla- Vélskóla og Stýrimannaskóla Vestmannaeyja. Gerðist kennari við Framhaldsskóla Vestmannaeyja við stofnun hans og fram til 1986. Hóf aftur kennslu við Hamarsskóla Vestmannaeyja uns ég flutti til Akureyrar sumarið 2001.

Hef veitt Hvítasunnukirkjunni Betel í Vestmannaeyjum forstöðu fram til miðs árs 2001 og verið forstöðumaður Hvítasunnukirkjunnar á Akureyri frá 2004 - 2018. 

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Myndaalbúm

Nýjustu myndir

  • IMG_1548
  • friðrik
  • sveitadúkurinn
  • papakrossinn
  • Betesta

Heimsóknir

Flettingar

  • Í dag (29.3.): 2
  • Sl. sólarhring: 8
  • Sl. viku: 86
  • Frá upphafi: 240818

Annað

  • Innlit í dag: 2
  • Innlit sl. viku: 78
  • Gestir í dag: 2
  • IP-tölur í dag: 2

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband