Hvar er ,,Viðlagasjóður"?

Nýtt frumvarp var lagt fram á Alþingi í dag. Sigmundur Davíð kom með mjög áhugavert sjónarmið að nota fjármuni sem fyrir eru í stað þess að auka skatta á almenning.

Er það ekki svo, að Viðlagatrygging og Viðlagagjald er að finna í skattakerfinu. Við erum að borga þetta í ,,vörugjöldum" til að eiga varasjóð þegar í harðbakkann slær og náttúran rumskar. Hvar eru peningarnir?

Ég er algerlega sammála því að nýta sameiginlega fjármuni til að vernda virkjanir, byggðir og hafnir fyrir náttúru vá. En ef við erum að greiða nú þegar, ákveðið gjald til að viðhalda ,,Viðlaga-tryggingunni" er þá ekki óþarfi að koma með nýja gjaldtöku? Það mætti hækka gjaldskránna um þessi 8prómill.

Þegar gosið kom upp í Vestmannaeyjum fyir 50 árum þá var ríkisstjórnin ekki sein á sér að lána hverjum lögráða Eyjamanni 50.000kr strax. Svo greiddum við lánið mjög fljótlega þegar vinnan var komin og öryggið til framfærslu. Ríkissjóður hefur ótal möguleika á aðgerðum til góðra verka án þess að senda Grindvíkinga á lágar atvinnuleysisbætur til framfærslu. 

Ásmundur Friðriksson benti á það sem Alþingi ætti að samþykkja og það er gjaldfrestun á greiðslum lána Grindvíkinga og rýmka til fyrir þá meðan allt samfélag þeirra er í upplausn. Það léttir verulega á einstaklingum og fjölskyldum að vita hvernig má létta og mýkja ástandið Suður með Sjó.

Eitt er mér þó til mikillar furðu. Af hverju nefnir Forsetinn aldrei Guð þegar kemur að náttúru vám? Þó er hann ,,verndari Þjóðkirkjunnar"! Á Gosafmælinu í Eyjum hrósaði hann Eyjamönnum fyrir æðruleysi og samstöðu og í Hallgrímskirkju í gær hrósaði hann Grindvíkingum fyrir að hugga hvorn annan í eymdinni. Það má alþjóð vita að í gegnum svona voða atburði stendur enginn af sér storminn nema æðri máttur, Guð, komist að. Vonandi eiga Grindvíkingar ekki eftir að sjá höfnina hverfa, hús sín kaffærast í hrauni og sitja síðan eftir með aðeins brot af bótum fyrir andvirði fasteignanna sem eyðilögðust.

Hér má hið háa Alþingi koma að málum til að tryggja Grindvíkingum farsæla framtíð.

Sjá ekki allir að Svartsengi er í uppnámi? Hvað gera menn ef rafmagnsframleiðslan hættir. Heil virkjun farin! Má þá byggja aðra? Náttúruverndarsjónarmiðin hafa  farið í harða andstöðu við virkjunaráform undanfarinna ára. Það er betra að hafa fleirri en færri virkjanir. Hafa Vogar ekki staðið árum saman gegn bættum flutningi á rafmagni um sitt land og óskað eftir að flutningslínurnar verði meðfram fjöllunum, gossvæðinu?
Hvenær ætla Íslendingar að læra að búa í landinu, gera það ,,undirgefið okkur" og nýta auðlindirnar öllum til góðs? Sjá menn það ekki að þar sem virkjanir eru þar er fögur náttúra og vel gengið frá svæðinu umhverfis mannvirkin?

Guð blessi Ísland allt og sérhvert byggðarlag!

Amen.

Snorri í Betel