Stefnumót við Guð!

Guð er áreiðanlega til. Það sést af þeim furðuverkum náttúrunnar sem við augum blasa. Það má lesa af öllum lögmálum sem bæði líf-, efna- og eðlisfræðin hafa uppgötvað og við segjum kristaltær lögmál. Einhver bjó þessi lögmál því áður en miklihvellur varð voru þessi lögmál ekki til - eða geymd annarsstaðar.

Góður Guð er til vegna þess að hið illa er til. Guð er góður enda skapaði hann allt sér til ánægju og okkur til hagsbóta og gleði. Það t.d ber vitni um góðan Guð að hann lætur rigna yfir réttláta og rangláta, gefur mönnum brauð og lætur tilveruna skaffa lífvænlegt umhverfi hvort sem maðurinn er góður eða illur, réttlátur eða ranglátur.

Guð veitir mönnum vernd frá hinu illa og upplýsingar um hvernig forðast megi hið illa. Guð er góður og hefur sett í tilveruna ferðaáætlun þar sem  tilveran öll, þú og ég, munum honum mæta á ákveðnu augnabliki öll sem eitt. Það verður á dómsdegi!

Guð hefur opnað okkur möguleikann að klæðast þeim fötum sem passa við tilefnið. Á stefnumótið við Guð á enginn að mæta "nakinn"! heldur í skrúðklæðum.

Þessi klæði eru stundum nefnd og þá er sagt að við séum "íklædd Kristi". 

Við að íklæðast Kristi breytast menn. Páll postuli var ofsæknandi kristninnar og manndrápari. En eftir að hann mætti Kristi þá breyttist hann. Hinn algóði Guð opnaði Páli leið inní klæðaskápinn þar sem réttlætisskrúðann var að fá. Páll kom út úr skápnum betri maður, læknaður af öllu illu og umskapaður Guði að skapi, Guði til dýrðar.

Guð sendi Pál með þessa reynslu og skilaboð Jesú Krists til að flytja þér tíðindin og örva þig í að læra gæsku meistarans. Því Guð er góður!

Þegar hlutverki Páls lauk þá fékk "söfnuðurinn" (ekklesian) hlutverkið að bjóða fórnarlömbum svika, ginninga og illsku að snúa við frá vondum vegum og ganga Jesú á hönd. Þá fá menn nýju réttlætisklæðin.

Kirkjan á að minna okkur á klæðaskápinn sem geymir skrúða réttlætisins - í hann þarftu að fara áður en þú mætir algóðum Guði. Sá réttlætisskrúði  verndar þig einnig fyrir blekkingum Satans. Þær blekkingar vilja hafa þig óbreyttan - "að þú verðir eins og þú ert". Kirkjan er líka að bregðast köllun sinni og lokar klæðaskápnum fyrir þér ef hún er að forðast að boða mönnum að gera iðrun og snúa við.

Hinn algóði Guð hefur samt opnað þér leið í gegnum aðra boðbera sem halda áfram að benda þér á Biblíuna og treysta því sem þar stendur en forðast blekkingarvef munaðarlífsins, guðleysisins og falskrar guðfræði. Þau fræði segja þér að gera ekkert í þínum málum, bara ana áfram sömu óheillaslóðana því það er hvort eð er enginn betri eða fullkomnari en þú.

Hinn algóði Guð gaf þér Jesú sem lausnara, það var hann sem vígði okkur nýjan veg og lifandi inn til Guðs. Jesús tók brauð, braut það og sagði: "Drekki allir hér af. Þetta er blóð mitt, blóð hins nýja testamentis, úthellt til margra til fyrirgefninga synda." (Matt.26: 28).

Enginn nema algóður Guð opnaði þér þessa leið! En hver hindrar þig í að fara hana?

Þrjóska, þvermóðska og vald syndar og Satans.

Guð er góður! " allur heimurinn er á valdi hins vonda".   (1.Jóh.5:19) En aðeins einn hefur sigrðar allt hið illa fyrir þig og það er Jesús frá Nasaret.

Gakktu í Jesú fram fyrir Guð almáttugan skapara himins og jarðar. Þú munt finna hann sem vin, þinn besta vin!

Gæska Guðs vill leiða þig til iðrunar!

Kær kveðja

Snorri í Betel

Athugasemdir

[Dingli, 10.5.2010 kl. 07:49]

Sæll Snorri.  Með því hugarfari að leyfa þeim sem trúa, að trúa því sem þeir vilja meðan þeir angra mig ekki, er ég hættur við þær ótal athugasemdir sem mig langaði að gera við ..... í þessum pistli.

[Sigurður Rósant, 13.5.2010 kl. 17:13]

Guð er áreiðanlega til.

Ertu að meina þennan guð sem sagt er frá í 1. Mósebók 3:8 og var að njósna um Adam og Evu?

En er þau heyrðu til Drottins Guðs, sem var á gangi í aldingarðinum í kveldsvalanum, þá reyndi maðurinn og kona hans að fela sig fyrir Drottni Guði millum trjánna í aldingarðinum.

Veistu nokkuð hvað olli því að þessi guð hefur ekki sést á kvöldgöngum síðan?

Það sést af þeim furðuverkum náttúrunnar sem við augum blasa.

Já, það er óneitanlega freistandi að trúa því að einhver hönnuður hafi verið þarna að verki. En sú tilgáta fellur strax um sjáfa sig þegar spurt er -Hver hannaði þann guð?-

En skráendur rita Biblíunnar fara svo að spinna út frá þessari kvöldgönguhugmynd og öðrum samtals- og samskiptasögum milli guðs og manna, sona guðs og jarðardætra o.s.frv. sem koma fyrir í Mósebókum.

Finnst þér það ekki full mikið, Snorri, að sagnamenn/konur rita Biblíunnar fullyrða eitt og annað um orð guðs, verk guðs, eðli guðs o.s.frv. ?  Kannski bara út frá einni saklausri kvöldsögu sem ætluð var börnum í Suð-austur Tyrklandi eða þar um slóðir?

[Þorsteinn Sch Thorsteinsson (IP-tala skráð) 18.5.2010 kl. 11:40]

Sæll Snorri

Hvað á þetta að þýða hérna hjá þér Snorri: " Góður Guð er til vegna þess að hið illa er til." ?

Þegar hið illa er ekki til staðar lengur í heiminum (og hið illa er farið algjörlega) er þá Góður Guð ekki lengur til eða er Guð ekki lengur góður í þessu sambandi? Hvernig er annars allt hjá þér Snorri?

[Snorri Óskarsson, 18.5.2010 kl. 23:49]

Sæll Þorsteinn.

takk fyrir þetta og gott að þú spyrð. Því er nefnilega svo farið að margir hafna tilvist Guðs. Þeir sjá hann ekki né finna.  Þeir geta ekki neitað tilvist hins illa, það hefur augljós áhrif og birtist margvíslega, samt veit enginn hvaðan það kemur.

En Guð vara okkur einmitt við þessu fyrirbæri og býður sjálfan sig fram sem vörn og vin. Hinn algóði Guð á auðvitað að vera viðurkenndur hjá okkur, skilyrðislaust.

Nei, Guð verður alltaf til en þegar hið illa er horfið, verður ekki nauðsynlegt að tala um algóðan Guð. Ekki þarf að taka það fram þá.

kær kveðja

Snorri

[Polli, 19.5.2010 kl. 00:09]

Guð? Hvað er það? Er hann fyrir alla eða bara fyrir einfeldinga? Hvar er hann? Setti hann gosið í Eyjafjallajökli af stað? Er Guð kannski bara iðnaðarvara samtímans? Þeirra sem nenna ekki að vinna ærleg handtök, en hengja sig í sífellu í nauðsyn boðunarinnar?  

[Snorri Óskarsson, 19.5.2010 kl. 16:07]

Bryggju - Polli

Ég sá þetta sem kynningu á þínu bloggi.

"Á þessari síðu verður að mestu hálfgerð vitleysa. Vitleysa fundin á fréttamiðlum og heimskulegum bloggsíðum, en þær eru all margar. Svo flýtur eitthvað gáfulegt, eða minna vitlaust, líka með"

Ég birti athugasemd þína og bendi þér á að hún er ekki bara hálfgerð vitleysa heldur miklu meira en það.

Davíðssálmur 53 hefur boðskap til þín. Hann er á bls 589 í Gamla-Testamentinu og upplýsir þig um kjarna málsins. Lestu hann!

kær kveðja

Snorri

[Polli, 19.5.2010 kl. 18:49]

Gamla Testamentið er ekki í mínu bókasafni.

Bestu kveðjur, Polli

[Snorri Óskarsson, 23.5.2010 kl. 15:18]

Þá siturðu að lélegu bókasafni, en því má breyta hið snarasta. Nýja-testamentið frá Gideon sem þú fékkst gefins sem 10 ára polli, getur komið þér að notum.

kveðja

Snorri