Jesús og þú?

Þessar fréttir hljóma í eyrum mér sem "furðufrétt" eða jafnvel "ekki frétt"! En samt finnst mér merkilegt hve margir nútímamenn þekkja andlit á Jesú Kristi, gyðingnum sem fæddist fyrir 2000 árum, rúmlega!  Hvað ætli það sé í okkur mönnunum sem vekur þessi hughrif?

Jesús fæddist sem ungbarn og var lagður í jötu. Himnintungl og stjörnur könnuðust við hann og leiðbeindu vitringunum frá Persíu til Ísraels og síðan til Betlehem.

Í höll Heródesar var kallað á hina skriftlærðu og þeir spurðir hvað fornu spámannaritin greindu frá um fæðingu hins smurða, Messías? Þá flettu men uppá staðnum hjá Míka spámanni í kafla 5. Engin spurning var um efni textans, Jú, Kristur átti að fæðast í Betlehem. En ekki er frá því greint að nokkur hafi slegist í för með vitringunum að líta með eigin augum hið spámannlega undur. Þeir sátu sem fastast í lærdómssetrum en vitringarnir létu stjörnuna ráða för. Táknið á himnum kallaði á viðbrögð!

Hjarðmenn á völlum fóru til að skoða barnið og litu það með eigin augum. Ekki var nein skýjamyndun eða svartir blettir á banana sem var með andlit Jesú, heldur hvítvoðungur, reifaður og liggjandi í jötu búsmalans. Jötunni var ekki haldið til hag eða hún sett á safn. Ekkert andlit friðarhöfðingjans mikla grópaðist í fjalir jötunnar.

Jesaja sá þetta andlit 600 árum áður en vitringarnir og hirðingjarnir mættu að jötunni. Hann lýsti því þannig:"Hann var hvorki fagur né glæsilegur svo að oss gæfi á að líta, né álitlegur svo að oss fyndist til um hann". (Jes.53:2).

En hann kom til að verða krossfestur svo að hann mætti frelsa synduga menn. Og við fáum að halda hátíðirnar hans, jól, páska, hvítasunnu og sunnudaga til að minna okkur á þessa stórkostlegu gjöf Guðs.

Andlit hans er einnig að finna á líkklæðunum sem hann notaði eina helgi um árið 30 e.kr. þegar hann steig niður til Heljar og prédikaði fyrir öndunum sem syndguðu áður og öðrumsálum réttlátra sem biðu í forsal himinsins en höfðu ekki komist inn fyrr en Jesús Kristur opnaði okkur nýjan veg og lifandi, í gegnum fortjaldið- líkama sinn- og inní hið allra helgasta!

Svo á hann  að birtast í huga okkar og háttalagi. Við erum kölluð til að vera hans lærisveinar. Þúsundir barna eru borin til skírnar á hverju ári, annar eins skammtur unglinga mætir til ferminga og heitir því að gera þennan Jesú að leiðtoga lífsins. En .. birtist hann í okkar mannlífi? Sést hann í mér og þér?

Það er kaldhæðið að andlit hans sjáist á bananahýði, innihurð eða skýjamyndum en ekki í okkur! Samt sagði Jesús í Æðstaprestsbæn sinni:"Í þeim er ég dýrlegur orðinn". (Jóh.17:10). Þannig eru hinir kristnu útvaldir til að birta mynd og persónu Jesú krists. 

Ætli við stöndum okkur betur en bananahýði?

Gleðileg jól.

Snorri í Betel

Jesús birtist á banana

Athugasemdir

[Rafn Haraldur Sigurðsson (IP-tala skráð) 27.12.2009 kl. 13:40]

Ekki veit ég hvernig Jesús leit út, en myndin á hýðinu svipar til einhvers  og fólk gefur sér að það sé Jesú. Ef einhver spyrði mig af hverjum myndin væri þá myndi ég svara:"Essasú?"

kveðja.

[Óskar Arnórsson, 1.1.2010 kl. 17:35]

Auðvitað er þetta ótrúlegt að þekkja mynd af bananahýði. Af manni sem er meira enn 2000 ára gamall. Ég er mestu erfiðleikum að þekkja sjálfan mig á skólamyndum og þekki mig alls ekki á myndum þegar ég var í vöggu.

Ég gerði einmitt  pistil um þetta, því það hafði líka verið kona í útlöndum sem Jesú birtist á botninum á straujárni sem nú er heilagt. Það má ekkert nota það, þar sem það er hálfgert guðlast að nudda andliti frelsarans sjóðheitu á alls konar garma sem verið er að reyna að slétta.

Alla vega, þá vakti þetta straujárn heimsathygli. Jesú sjálfur, sem ég er ekki í neinum vafa að hefur húmor fyrir því mesta, hlýtur að veltast um af hlátri yfir þessu...annað er bara ekki hægt. 

[G.Helga Ingadóttir, 3.1.2010 kl. 00:11]

Já margt er skrítið í Kýrhausnum, Jesús sagði, að ef þú trúir, þá muntu sjá dýrð Guðs. Það er nóg fyrir mig, meira en nóg ...