Orð, til lífs eða dauða.

Hefurðu heyrt um Litla-Jón?

Hvort var hann giftur Litlu-Gunnu eða í útlagahópi Hróa- Hattar?

Það breytir nokkuð viðurnefninu í hvaða samhengi við setjum persónuna. Viðurnefnin geta verið saklaus, skemmtileg eða sálar drepandi.

Sagt er um Færeying nokkurn sem var í nöp við Landsstjórnina að eitt kvöldið braut hann allar rúður í "Landstýrihúsinu". Rúðurnar voru samtals 95 talsins. Eftir það fékk hann á sig nafnið "Windows 95"! Tilefnið var komið og refsingin fullkomin - hann situr uppi með gerðir sínar.

Það ber enginn höfuðið hátt með meiðandi viðurnefni. Þetta hefur orðið mönnum afar ljóst í Vestmannaeyjum eftir að bók um viðurnefni í Vestmannaeyjum var gefin út - og tekin úr sölu.

Í Lesbók Mbl. (23.ágúst 2008) var efni bókarinnar gerð skil á faglegan hátt og þakka ég höfundi greinarinnar, Gísla Pálssyni, innilega fyrir meitlaða umfjöllun.

Ég þekki nefnilega margt af þessu fólki sem fékk viðurnefni. Sum hljóma í mínum eyrum sem gæluyrði. Ég hef notað þau og ávarpað viðkomandi með þeim. Sumir voru óþekktir af nöfnum sínum því þeir voru ekki annað en það sem viðurnefnið sagði. Þessi viðurnefni voru skemmtileg, Gaui á Látrum, Mari píbó, Súlli á Saltó, Steini stóri og Jói danski. Þessi nöfn eru skemmtileg og tengjast þannig fólki.

Einu sinni var kveðin vísa um Eyjanna bestu nöfn:

Húllum hæ, Ási í bæ.

Geiri gæ, Stebbi Pól

Figgi á Hól 

Bragi í Höfn, Trani í "Gödn" 

Þetta´eru bæjarins bestu nöfn!

 

Hina þekki ég líka sem báru viðurnefni en enginn notaði nema helst þegar gjóað var augum eða viðkomandi ekki heyrði. Það vissu allir að persónan bar þungan kross sem samfélagið lagði á hana og við sögðum fátt til varnar  Í besta falli þá notuðum við ekki viðurnöfnin eða leiðréttum þá sem gripu til viðurnefnisins en trúlega unnu fáir í því að þvo nafngiftina af persónunni. Eða hvernig var það hægt?

Viðurnefnið setti persónuna í samfélagsbás og þar var fjölskyldan ásamt kunningjum. Oft var tilefnið lítið en þó kom að því að sumar stúlkurnar (aðallega) sem eru ömmur í dag fengu viðurnefnið vegna frjálslyndis í ástarmálum eða óvandaðs lífernis. Þær skemmtu sér eins og það var kallað, voru sætar og vinsælar en skemmtunin var dýr og launuð með illu viðurnefni. Hún sat uppi með skömm og reyndi árangurslaust að vinda ofan af sér viðurnefninu. Þá var hún 16 eða 17 ára og glannaleg unglingsstelpa. 50 árum síðar veit allur bærinn um háttalag sem margir nýttu sér en köstuðu síðan grjóti til baka í "þakklætisskyni"!

Þetta gerist í mannfélagi sem kallast kristið. En hefur kristin trú ekki einhver orð um þessa hegðun manna? Biblían segir:

"Tungan er  líka eldur! Tungan er ranglætisheimur meðal lima vorra; hún flekkar allan líkamann og kveikir í hjóli tilverunnar en er sjálf tendruð í helvíti". (Jak.3: 6 - 7) 

Þessi fullyrðing Jakobs Jósefssonar frá Nasaret, hálfbróður Jesú, er hægt að heimfæra uppá Vestmannaeyinga sem gættu ekki að meðbróður/systur og festu klístur helvítis á þá/þau. Er ekki augljóst tilefni af þessari bókaútgáfu, studdri af Bæjarsjóði Vestmannaeyja, að  draga fram í umræðuna iðrunarboðskap Biblíunnar. Hér er komin ærin ástæða til að við sem liggjum undir þessari sök að hafa kastað auri yfir samborgara, biðjum þá fyrirgefningar og snúum við af þessari vondu braut. Ég vil geta horft framaní hvern þann sem að ósekju situr undir illu viðurnefni og rétta hlut hans. Ég vil þvo af Vestmannaeyingum hrakyrði fyrri kynslóða. Ég vil líka benda okkur á og draga fram í dagsljósið að þessi orðasmíð sannar að það býr fleirra í Vestmannaeyingum en góð sál. Og sálina hreinsar enginn annar en Jesús Kristur. Hann kom til að frelsa synduga menn.

 Liggur ekki í augum uppi að við eigum að biðja Jesú að hreinsa hjarta og hugarfar svo náungi okkar fái að reyna hvatningu og uppörvun á komandi tímum. Þegar við gerum þetta upp og tölum rétt þá kemur Guðs-ríkið yfir okkur, Vestmannaeyjar fyrst og svo okkur hin á úteyjunni stóru, Íslandi.

Munum að af orðum okkar verðum við réttlætt og af orðum okkar verðum við einnig sakfelld. Hvort þú færð er þitt val.

kær kveðja

Snorri í Betel 

Gröfin kjaftar frá!

Gröfin hefur að geyma bein manna, risaeðla og risakrókódíla. Af hverju ætli sama gröfin hafi verið notuð fyrir skepnur og menn? Það eru 109.990.000, hundraðog níumilljón og níutíuþúsund ár á milli þess sem krókódíllinn var grafinn og mennirnir  lagðir til hinstu hvíldar. Eða eru útreikningarnir eitthvað í rugli?

það skyldi þó ekki vera að þessi gröf bendir á að lífið er ungt og þessi risa-dýr voru samtíma mönnum? Hvað ætli menn þurfi að finna marga grafreiti manna og risaeðla til að vita að þau deildu sama líftíma hér á jörðinni?

Allir sem rannsaka þessi þætti með gagnrýnni vísindalegri nákvæmni sjá að menn og risaskepnurnar voru uppi á sama tíma. Lífið er ungt! Það segir Biblían líka!

En Biblían boðar einnig að þú getur eignast eilíft líf, án enda - það er afar spennandi valkostur. Hefurðu hugsað þennan möguleika fyrir þig?

kær kveðja

Snorri í Betel 

Vísindamenn fundu stærðarinnar grafreit frá steinöld

Þetta hljómar eins og "hebreska"!

Ég hef farið nokkrum sinnum til Ísraels og aldrei fengið hótanir né ógnanir eins og hér er talað um. Það land og þeir gyðingar sem ég hef séð hafa allt annan mann að geyma.

Ég hef líka lesið frásögur  Sveins Rúnars Haukssonar um ástandið hjá "vondu gyðingunum" og ekkert af því hef ég sjálfur upplifað eða fundið fyrir á mínum ferðum til landsins helga.

En hitt veit ég að það var Palestínuarabi sem ók á stórri vélskóflu yfir fólksbíla og á strætisvagn án þess að hóta einum né neinum. Hann lét til skarar skríða. Ég veit líka að þrátt fyrir allar tilraunir til friðar hefur ekkert friðarsamkomulag haldist við Palestínumenn.

Ég veit líka að drápin á Al-Dura feðgunum voru nýlega dæmt af frönskum dómstóli sem fréttafölsun  palestínsks fréttamanns. Hvergi sást blóð né sár á "líkum feðganna".

Það er einnig vitað að Palestínumenn hafa gert sig seka um að nota sjúkrabíla til að smygla vopnum og sprengjum yfir til Ísraels. Þeir hafa einnig notað sjúkrahús sem byrgðastöðvar fyrir vopn, skotfæri og sprengjur. Allt í illum tilgangi.

Varkár ísraelsku hermaður hefur ekki haft í hótunum nema áhöfn sjúkrabílsins hafi sýnt mótþróa og  lélega samvinnu. Því miður held ég að samtökin Ísland-Palestína teljist ekki trúverðug þegar þau tala um Ísrael.  Alla vega er mín reynsla allt önnur en þeirra. Ég á aðeins lúfar minningar um gyðingana og samskipti við þá.

Þeir Palestínuarabar sem ég hef talað við um ástandið milli gyðinga og þeirra hæla gyðingunum en benda á að þeirra stjórnendur hafa sýnt lélega dómgreind í friðvænlegum samskiptum  við gyðinga.

Kær kveðja

Snorri í Betel 

„Ég ætti helst að skjóta ykkur“

Ný réttindi!

Alltaf lagast ástandið. Bensínið lækkar (eitthvað), ljósmæður fá ekki laun við hæfi, hjúkkur ætla í yfirvinnubann og Ramses gerður útlægur. En þar með er nú ekki öll sagan sögð því prestar og safnaðarhirðar hafa fengið aukin réttindi frá Alþingi. Nú má ég t.d. gifta tvo karla eða tvær konur skv. íslenskum lögum. Yfir 70% presta sögðust ætla að framkvæma slíka athöfn en aðeins 5,5% þeirra höfðu klára Biblíulega afstöðu að blessa ekki slík sambönd. Enn eru 22.5% presta þjóðkirkjunnar að "hugsa málið"!

Biskup lætur ekki heyra frá sér og Björg Eva pirrast í forystugrein "sólarhringsins" vegna þess. Samt segir Biblían að Guð hafi skapað karl og konu til að þau tvö verði eitt hold. Er einhver ástæða að pirrast út í biskup? Jú trúlega vegna þess að aragrúi presta reiðir sig ekki á Orð Guðs. Þjóðkirkjan er ekki að fara eftir skikkan skaparans og boðskap Jesú Krists. Svo eina rétta svar biskups ætti að vera uppsagnarbréf til allra prestanna sem hafa svarað því játandi að blessa samkynhneigða í heilaga"samvist".

Hvað á að gera t.d. við svo elskulegt fólk sem elskar margar konur eða konur sem elska marga menn? Má ekki veita þeim aukin mannréttindi og efna til fjölkvænis eða fjölveris í nafni umburðarlyndis, kærleika og mannréttinda?  Það var vitað árið 1992 þegar Pressan gerði úttekt á kynhegðun Íslendinga að af 62% sem svöruðu voru 0,7% samkynhneigðir en 3,1% tvíkynhneigðir.  Ætli hinir tvíkynhneigðu fari ekki fram á aukin réttindi og vígslublessanir frá prestunum? Trúlega vita flestir hvað Biblían segir um slík sambönd en breytir það einhverju í dag hjá 70% vígðum þjónum til Guðskristni á Fróni? 

Þvi er nefnilega svo undarlega farið að þetta málefni hefur siglt hraðbyri um sali Alþingis í nafni mannréttinda. En mér finnst skrítið hve hægt miðar að mannréttindi kvenna til réttlátra launa nái fram að ganga. Gæti það verið vegna þess að laun kvennanna snerta hendur þeirra en ekki kynfæri?  Mannréttindi kynhegðunar er tekið opnum örmum af þingi og þjóðkirkju. Í ljósi þess að frjálsræði í slíkum efnum hefur alltaf verið illt manni og skaðar þá sem lifa í andstöðu við Guðs Orð. Segir þetta ekki eitthvað um samtímann?  Ramses fær að fjúka, fjölskyldu hans tvístrað vegna þess að mannréttindi þeirra hjóna eru fyrir borð borin. Þó er þeirra samband blessað bæði af Guði og mönnum!

Ég tel þjóna þjóðkirkjunnar  alls ekki sitja á friðarstóli í ljósi enn fleirri furðufrétta sem berast til okkar og það t.d. um mannréttindi mannapanna á Spáni. Heimspekingunum Peter Singer og Paolu Cavalieri gengur eflaust allt gott til þegar þau lögðu fram þessa tillögu. En er það ekki alveg deginum ljósara að aparnir þurfa ekki mannréttindi? Er hér um að ræða einhverja framúrstefnu-músik. Hafa þeir þróast svo hratt að þeir fallia inní mannheima? Getur það verið að seinna fái mannapar að ganga í blessaða samvist við menn og vígslan framkvæmd af presti? Biblían hefur svo sem ekkert innlegg lengur í þessa umræðu og orð hennar hafa ekki verið haldbær rök alllengi. Meira að segja hefur nýja þýðingin verið snyrt til svo stingandi orð eru vart sýnileg. En á hverju ætlar kirkjan að byggja boðun sína og siðferðisleg viðmið? Varla á orðum Biblíunnar sem "lítið mark er takandi á"?

Menn hafa alla vega  Björgu Evu og aðra ritstjóra dagblaðanna sem hafa fagnað afkristnun íslensks samfélags?

Gleymum því samt ekki að engum manni voru gefin réttindi til að syndga gegn Guði eða náunganum.

kveðja

Snorri í Betel 

 

Sami fjöldi og fóstureyðingar á einu ári!

Þessi mynd sló mig sárt. Ég á nefnilega einn vin sem fór svo snöggt í umferðaróhappi í hægri umferðinni. En þessi fjöldi er fórnarkostnaður umferðarinnar síðastliðin 40 ár.

Til er sami fjöldi sem fékk aldrei að fara í skóna og feta ævibrautina. Honum var eytt á einu ári í öruggasta umhverfi Íslands á skuðrstofum sjúkrahúsanna, -þar sem tæknin er í toppi.

Sá fjöldi lét lífið á aðeins einu ári. Við köllum það fóstureyðingu. Flestar eru framkvæmdar af "félagslegum ástæðum". Aldur þeirra sem láta eyða fóstri er ekki barnungar óþroskaðar stúlkur heldur þær sem eru í háskólanámi og ætla ekki að láta barn stöðva sig á framabraut. Feðurnir hafa lítið um þetta að segja en flestir eru líka því sammála að börnunum sé hreinlega eytt. Þá trufla þau ekkert. Eða er það?
Vita menn um þá vanlíðan sem kona fær árum saman eftir fóstureyðingu. Hún þarf lausn sinna mála. Guð  sem segir okkur að varðveita lífið og taka á móti börnunum okkar vill komast að til að leiðrétta  okkur. Hann einn getur fyrirgefið og snúið óhamingjunni í sáttargjörð.  Geðlyfin og róandi töflur slá á sársaukann en taka ekki í burtu meinið.

Snúum frá braut dauðans í daglegri umferð og meðgöngu. Þá koma endurlífgunartímar frá Guði yfir þjóðina.

Snorri í Betel 

Hisbolla og Líbanon?

Af hverju eru Hisbolla að semja um framtíð Líbanons? Eru Hisbolla samtökin ekki landlausir Palestínumenn sem "rændir voru eignum sínum af gyðingum og eru að reyna að fá eignahlut sinn til baka". Höfum við heyrt fréttir um annað en að hörmungar þeirra eru allar Ísraelum að kenna?

Hvernig stendur á því að þeir hafa samningsaðstöðu gagnvart stjórnvöldum í Líbanon? Jú, af því að þeir virða ekki ríki sem lútir ekki þeirra stjórn. Hér er eitt dæmið sem blasir við hvers vegna það er sjálfsmorði líkast að semja við samtök sem þekkja ekki takmörk sín né gildi þess að vera sanngjörn. Virðing fyrir kristnum og gyðingum er skelfilaga lítil.

Af þessu er aðeins ein niðurstaða að friður næst aldrei meðan svona samtök lifa. Eins og fer fyrir Líbanon þannig vilja menn að fari einnig fyrir Ísrael. Bara að vestræn ríki læri af þessu dæmi. Því annars þurfa sömu ríkin (Evrópa + Bandaríkin) að mæta með heri sína á svæðið til að stilla til friðar og þá verða þeim ekki vandaðar kveðjurnar. En spádómar Biblíunnar segja að þannig muni mál þróast ( Esek. 38 & 39; Jóel 3, Sakar. 12 og 14).

Hvernig ætli spámenn Biblíunnar hafi fengið þessar upplýsingar um skipan mála á okkar dögum? Það hlýtur að vera vegna þess að menn velja leiðina burt frá Guði; ófrið frekar en frið og græðgi framyfir sanngirni.

Biblían segir jafnframt að við svona ástand muni Kristur aftur stíga til jarðarinnar með sínum himnesku hersveitum. Það verður öllum til bjargar - veri hann hjartanlega velkominn!

kveðja

snorri í betel

Forsetakosningar í Líbanon á sunnudag

Ísrael 60 ára!

Það gerðist á einum degi að ríkið var stofnað. 14. maí 1947. Sá dagur bjartur og hlýr í sögu gyðinga. Reyndar var tilurð Ísraelsríkis merkasta og besta verk Sameinuðu þjóðanna til að leysa þjóðarvanda og efla skilning manna á milli. Thor Thors var fulltrúi Íslands hjá S.Þ. og hann samdi þá yfirlýsingu sem var samþykkt með yfirgnæfandi meirihluta atkvæða. Ben Gurion hafði lagt á það áherslu mánuðina áður að hafa öll skjöl klár fyrir Knesset ef til þessa gæti komið að gefið yrði grænt ljós á stofnun gyðingaríkis. Svo þegar yfirlýsing S.Þ. var samþykkt þá var ísraelska þingið kallað saman til að samþykkja stofnun Ísraels. Allt gekk upp - Ben Gurion reyndist hinn forsjáli leiðtogi.

En Arabaríkin voru nú ekki öll hrifin af þessu tiltæki. Líbanon sem fékk sjálfstæði frá Frökkum 1924 galt nei við því að Ísrael yrði stofnað. Þetta unga ríki var í nokkra áratugi einn glæsilegasti vottu um samspil kristni og Islam því Líbanon var heimsfrægt fyrir fjármála sýslu og hagsæld. Beirút var kölluð "París" Austurlanda. En verður urðu válynd fyrir botni Miðjarðarhafs.

1968 átti að eyða Ísrael og þá voru Arabarnir hvattir til af sínum leiðtogum að yfirgefa Ísrael svo innrásarherirnir fengju frið til að eyða gyðingum en ekki meðbræðrum. Þá var ísrael aðeins 20 ára.  

1974 braust út borgarastyrjöld í Líbanon. Þar voru að verki Palestínuarabar sem vildu hreiðra um sig og verða "ríki í ríkinu" í þeim tilgangi að eyða Ísrael. Þeir settu upp vegatálma og hófu að skoða vegabréf þeirra sem voru á ferð. Ef í vegabréfið var skráð að handhafi þess væri kristinn varð meðhöndlunin sú að vera dreginn út úr bílnum, upp að næsta vegg og skotinn. Hann var kristinn, ofbeldisverkin áttu að fá alla Líbani til að gerast fylgendur Múhammeðs. Líbanir fengu yfir sig Hisbollah. Nú vilja Hisbollah Ísrael. Líbanon er hrunið. En Ísrael stendur enn!

Palestína var talin hafa u.þ.b. 250.000 íbúa beggja megin Jórdanár á árabilinu 1800 til 1850. Palestína var þekkt sem sandauðn meðan Tyrkir réðu landinu (1516 - 1917). Bedúínar sem fóru um landið í flokkum sáu til þess að ekki væri hægt að endurreisa landið. "Hver sem reyndi fékk á sig árás, ógn og skelfingu. Annað hvort var fólkið drepið eða sent í burt en þorpið var örugglega eyðilagt".(Peters. Time Immemoria. 158-160,165-167: S.Bergs.Heilagt stríð um Palestínu bls.18).

En þessi sandauðn var sögustaður Hebreanna, forfeðra gyðinga. Mark Twain fór um Galíleu i kringum 1860 og ritar: "..þessar óbyggðu hæðir Galíleu, þessi hrjóstrugu og gróðurlausu fjöll, aldrei bærist neitt á hrikalegum útlínum þeirra." Þannig var umhorfs fyrir 140 árum við Galíleuvatn. En þá voru gyðingarnir farnir að snúa til Landsins Helga. Svo braust fyrri heimstyrjöldin út og þá náði Arabíu-Lórens Aqaba, Damaskus og Jerúsalem af Tyrkjum. Bretar stýrðu landinu fram til 15.maí 1947. En í seinni heimstyrjöldinni hrundi samfélag gyðinga. Þeir voru á hrakhólum. Evrópa í rúst. Ásóknin jókst til muna að fara heim en í hvað?

Arabar hófu uppreisn gegn Bretum og gyðingum (1936 - 1939) að undirlagi Þjóðverja sem borguðu brúsann. Þessari uppreisn var stjórnað af Hajj Amin al - Husseini muftanum í Jerúsalem. Ummæli hans voru: "Ég tilkynni Heilagt stríð! Islamskir bræður mínir! Myrðið gyðingana, myrðið þá alla".(David L. Fantasy og Facta, 210). Hamas hefur þennan mann sem fyrirmynd og ætlar að framkvæma stefnuna.

En ekki má gleyma því að Arabar voru enganveginn einhuga þessari stefnu heldur fögnuðu sumir gyðingum og vinguðust við þá. Hjá þeim var vinnu að hafa og velgengni. Hvergi hafa Arabar það betra en einmitt í Ísrael! 

En S.Þ. samþykkti og Ísraelsríkið var stofnað á einum degi. Arabaríkin söfnuðu saman her til frelsunar Palestínu og kölluðu herinn "Arab Liberation Army" (ALA) nafninu varð seinna breytt í "Palestinian Liberation Army" (PLA) sem breytt var aftur í PLO. Fyrsti herinn ALA var t.d. skipaður fyrrum SS-hermönnum frá Bosníu og Króatíu.

En við stofnun Ísraelsríkis hófu Arabarnir árás á hið nýja ríki og í raun herlaust Ísrael. En gyðingarnir höfðu roð við þeim vegna þjálfunar í skæruhernaði og landvarnarhópum. Því má ekki gleyma að Guð er með og þá verða styrjaldir leiddar til lykta á annan hátt en styrkleiki mannafla eða vopna ætla.

Þegar þjóð "fæðist á einum degi" er auðvitað nauðsynlegt að fá að vita hvaðan sú fullyrðing kemur? Frá spádómsbók Jesaja í kafla 66: 8 er einmitt sagt: "Er nokkurt land í heiminum borið á einum degi, eða fæðist nokkur þjóð allt í einu? Því að óðar en Zíon hefir kennt sóttar hefir hún alið börn sín."

Þannig rættist Orð Guðs fyrir 60 árum og sælir eru þeir sem heyra Guðs Orð og varðveita það!

En varðveitum við undrið, Orð Guðs sem rættist, Ísrael? Heyrum við óbrenglaðan fréttaflutning? Ég brýni alla til að taka afstöðu með Ísrael og læra af meðferðinni á Líbanon. Viljum við sjá Ísrael fara eins?

Skoðum í þessu samhengi annað sögulegt. Andstaða Araba við gyðinga er afleiðing af Nazismanum og áhrifa hans meðal þeirra. Það er því skylda allra manna sem elska lífið að standa með gyðingunum í baráttu þeirra fyrir tilveru sinni. Ekki viltu styðja naziska hugmyndafræði sem stelur slátrar og eyðileggur?

Líbanon var "kristið" land og það fékk þá útreið sem menn geta séð. Halda menn að Ísrael fái frið með friðarsamningum við þessi eyðingaröfl? 

Ísrael Guð blessi ykkur á þessum tímamótum og varðveiti þig á komandi árum.

Snorri í Betel 

Bókstafstrú og hættulegir guðfræðingar..

Ég heyri oft orðið "bókstafstrú" nefnda í samhenginu þröngsýnn, ómenntaður eða heimskur. Orði "heimskur" er dregið af því að þekkja til heima hjá sér en ekkert útfyrir þann ramma svo þá er ekki gefið í skyn að um greindarskort sé um að ræða heldur lítinn sjóndeildarhring.

Í þætti  Ævars Kjartanssonar var talað við  séra Sigurðar Árna í Neskirkju. Í spjalli þeirra mátti skilja að guðfræðin væri víðsýn, akademisk og umræðuvæn. Henni var teflt gegn "bókstafstrú" og "heimsenda" trúuðum. Þá hópa er víst helst að finna í Ameríku og þeir eru ekki góðir fulltrúar kristninnar enda er Bush forseti þeirra. Á Íslandi finnast nokkur eintök af þessum meintu "brjálæðingum" (mitt orðaval) og þeir tefla fram Opinberunarbókinni í sínum málflutning.

Mér fannst þetta afar undarleg framsetning hjá þessum guðfræðimenntuðu mönnum. Mér kom í hug hvort þeir væru þá alls ekki bókstafstrúar? Væri ekki vert að skoða fáein brot!

Jesús segir: "Allt það sem þér viljið að aðrir menn gjöri yður, það skuluð þér og þeim gjöra"! Ætti lesandinn að skilja þetta boð bókstaflega eða "guðfræðilega". 

Eða: Jesús segir:"Elskið óvini yðar og biðjið fyrir þeim sem ofsækja yður svo að þér reynist börn föður yðar á himnum er lætur sól sína renna upp yfir vonda sem góða og rigna yfir réttláta sem rangláta."

Þessar setningar (tilvitnanir í Jesú) eru gjarnan tekna bókstaflega. Börnunum eru sagðar sögurnar með þessum setningum til að innræta þeim manngæsku og anda fyrirgefningar.

Þegar við lesum freistingarsögu Jesú Krists þá ber hann fyrir sig ..hvað "bókstafstrú"? Því hann vísar orðrétt í ritningarnar eins og ekki þurfi mikla túlkun. "Ritað er: Eigi lifir maðurinn á einusaman brauði,,,. Aftur er ritað: Ekki skaltu freista Drottins Guðs þíns." 

Hvernig fer "guðfræðin" með svona tilvísanir? 

Um þessi orð er almenn sátt. Þess vegna mega þau standa óhreifð og vera  skilin bókstaflega. 

En þegar kemur að siðferðismálum samtímans þá beita menn "guðfræðirökunum" til að vera íhyggnir, djúpvitrir og lærðir. Þetta birtist helst í málefni samkynhneigðra. Þar hefur mikil réttindabarátta verið háð  sem hefur unnið til viðurkenningar á lífsmátanum.  Kirkjan má því ekki verða viðutan eða föst í viðjum bókstafstrúar. 

Sumir kirkjunnar þjónar hafa bent á guðfræði-rök til stuðnings samþykkt samkynhneigðar og biðja um lögleiðingu á giftingu þeirra í kirkjum landsins. En aðrir, þeir sem vísa til Biblíunnar og beita henni í umræðunum eru kallaðir svartstakkar, íhaldsamir eða gamaldags. Menn utan þjóðkirkjunnar sem benda á Biblíuna sem rök í málinu kallast "bókstafstrúar".

En Jesús segir: "Hafið þér eigi lesið að skaparinn gjörði þau frá upphafi karl og konu og sagði: Fyrir þvi skal maður yfirgefa föður og móður og bindast konu sinni og þau tvö skulu verða einn maður."

Hvað ætli Jesús segi um samkynhneigðina í ljósi þessara orða? Ætli Guðfræðin geti fundið annað en það sem liggur beinast við? 

Guðfræði postulans Páls var í sama anda og Jesú enda hefur hið sama bergmálað í kristninni frá gyðingdóminum til okkar daga.  Páll segir:"Villist ekki! Hvorki munu saurlífismenn, né skurðgoðadýrkendur, hórkarlar, né kynvillingar, þjófar, né ásælnir, drykkjumenn, lastmálir né ræningjar Guðs ríki erfa." Og þetta voruð þér sumir yðar. En þér létuð laugast, þér eruð helgaðir þér eruð réttlættir...(1.Kor.6:9 -11). 

það merkilega við guðfræði samtímans er að hún tekur aðeins tvö atriði út úr þessum texta frá 1981 og umbreytir honum að okkar almenningsáliti. Kynvilla var fjarlægð af því að orðið er meiðandi (skv. Guðrúnu Kvaran) og svo var fjarlægt úr bók Malakí að "Guð hataði hjónaskilnaði"!

'Eg ætla að sérhvert orð í þessum lista Páls sé meiðandi fyrir þann sem sök hefur fallið á. Þeir í Korintu höfðu áður tekið þátt í þessum athöfnum en lífsmátinn breyttist við kristnitökuna og menn lögðu af saurlífi, skurðgoðadýrkun, hórdóm kynvillu, þjófnað, ásælni (græðgi), drykkju, lastmælgi og rán. Kristnin var því þjóðfélagslega bætandi afl. Bókstafur Páls breytti fólki. Af hverju breytir guðfræðin ekki fólkinu í anda Páls postula og segi: "þetta voruð þér sumir"?

En í stað þess að hjálpa syndaranum til betri breytni þá breytir hún kirkjunni í ætt við þá sem ekki erfa Guðs ríkið og villast! Einn af prófessorum Guðfræðideildarinnar Þórir Kr. Þórðarson sagði í umræðuþætti sjónvarpsins um nazismann þegar spurt var hvernig svona gæti gerst að drepa 6 milljónir gyðinga, þá svaraði hann "þegar Guð er ekki til þá er þetta hægt".

Þetta rifjaðist upp fyrir mér við hlustun á þættinum Lóðrétt og Lárétt að guðfræðin er að taka í burt Orð Guðs-Biblíuna frá þjóðinni. Þegar menn segja að ef þú trúir Biblíunni þá ertu kominn í "skurðgoðadýrkun" þá er verið að benda fólkinu á að taka ekki mark á bókinni góðu. Menn segja í staðinn trúðu á Krist! En vita menn hvernig Kristur "lítur út" ef Biblían missir tiltrú og traust?

Ég sé því ekki annað en að sú Guðfræði sem nú er við lýði á Íslandi og samþykkt af mörgum kirkjuprestinum er bókstaflega Djöfulleg. Því þessi guðfræði gengur út á spurninguna. "Er það satt að Guð hafi sagt"? Þetta er sama ginning og felldi Adam og Evu og við erum ekki enn laus undan þeim ávexti, dauðann. Hvaða ávöxt má ætla að við fáum er kirkjan bregst, Biblíuna má ekki taka sanna og rétta og sannkristnir menn settir af í fjölmiðlum, skólum og opinberu lífi.

Veistu að ungt trúað fólk fær ekki að heimsækja skóla til að segja þeim frá Jesú Kristi? Veistu að Hvítasunnukirkjunni er meinað að koma með prédikun í sjónvarpi á hvítasunnudag? Veistu að þetta er allt gert í nafni kærleikans, umburðarlyndisins og tillitseminnar? Veistu að bloggið er vaktað til að tryggja að ekki sé sagt of mikið gegn Islam?
Þegar Islam er verndað en Biblíunni skellt í flokk hættulegra verkfæra þá er stutt í að  Guð  mæti með kústinn og sópi vel þetta land.  Það er samkvæmt bókstafnum.

Að lokum vil ég benda þér á eitt atriði sem tilheyrir þessum lastalista í 1.Kor.6. Þar fjallar Páll um græðgina. Hefurðu heyrt að vaxtalækkun kom til greina svo lækna megi íslenskan efnahag, lækka vöruverð og jafna byrðarnar. Bankarnir hafa sjálftöku í vöxtum og verðbótum. Ríkisstjórnin styður þá og varðveitir- væntanlega í góðri trú! En bankastjórar eru menn, seðlabanki og ríkisstjórn eru menn. Þeirra siðferðilegu viðmið ráða. Heyrum við kirkjuna hrópa til þeirra "varist alla ágirnd"!

Faraó tók aðeins 20% af korni til hliðar áður en hallærið kom svo þjóðin mætti lifa. Mafíósarnir tóku ekki 20% vexti af þeim sem þeir voru að kúga. En hvaða peningastofnun á Íslandi spyr um Biblíulegu hagfræðina. Hvaða prédikari hrópar til yfirvalda og bendir þeim á að Guði er það andstyggð að við séum kúguð og fjötruð með vaxtaokri? Segi guðfræðin eitthvað um þetta?

Biddu Guð að gefa þér eyru sem heyra hvað "andinn segir söfnuðinum" og þú megir vera vakandi í trú þegar Jesús Kristur kemur. Því allt hér ofanritað er frá greint að koma muni áður en Jesús hrífur sína til sín til fundar við sig í loftinu. Kjarni málsins er nefnilega sá að þú og ég eigum að vera læs á tákn tímanna því þau eru "bókstaflega" að rætast!

Þekkir guðfræðin þessi atriði?
Jesús kemur aftur og vill hafa þig með  í sínum  hópi.

kær kveðja

Snorri í Betel 

 

Lífið er þá ungt....

Elsta líf jarðar er þá ekki eldra þrátt fyrir kenningar manna um leifar verulega eldri plantna eða dýra. Menn vita mjög vel að elstu menningarsamfélög manna eru álíka gömul og sænska tréð. Enn fremur er þekkt að helstu leifar útdauðra dýra finnast í setlögum þar sem þau grófust í eðju undir vatni. Sum voru að flýja (flóðölduna?) og komust ekki undan.

Biblían segir okkur að lífið sé ungt, sköpunin ung og sænska furan, amerísku trén og fl. segja hið sama.

Kær

kveðja

Snori í Betel 

Elsta tréð er sænskt

Varnir okkar fyrir

Mér var hugsað til þess við lestur þessarar fréttar að það eru fleirri sem dreifa "vírusum" en tölvuþrjótar. En þeir vírusar eru sko ekki síður hættulegir!

Vírus er í líffræðinni nokkurskonar líflaus "hálffruma". Hann er algerlega hættulaus og óvirkur utan frumanna en ef hann kemst þangað inn þá breytir hann frumunni í útungunarvél á vírusum. Allt sem fruman  þarf að gera er hreinlega að hleypa ekki inn þessari óværu.

Vírusinn er því ekki ólíkur lyginni. Við menn erum afar viðkvæmir fyrir henni og ef hún,lygin, kemst inn í hausinn á okkur þá verðum við eins og sýkt fruma eða vírushlaðintölva og verðum undirlögð af lygi og dreifum henni til annarra af "sannleiksást".

Ég varð afar undrandi að sjá t.d. þegar Al Gore fyllti sal með hálærðu fólki og fékk vel borgað fyrir boðskap sem er blandaður af blekkingum. Hæstiréttur Bretlands hefur dæmt 11 atriði í boðskap Al Gore sem staðlaus og röng. Samt borga menn sig inná "staðlausa stafi".

Forseti hans, Bill Clinton, fékk greiddar 3,8 milljarða fyrir ræðuhöld sem gerðu lítið annað en að fylla veski hans af fjármunum áheyrendanna.

En svo höfum við afarmiklar varnir uppi þegar við heyrum menn tala um boðskap Jesú Krist. Þá verjumst við prédikuninni með orðum eins og "ofstæki", "sértrú", "bókstafstrú" eða þá "trúarfíkn". Og þessar "varnir" okkar varðveita vírusinn í hausnum á manneskjunni. Samt segir Jesús að hver sem á hann trúi glatist ekki heldur eignist eilíft líf!  Þvílík áhrif af því að taka þau orð inní hausinn á okkur. Enn fremur er sagt við postula Jesú Krists :"..og talið til lýðsins öll þessi lífsins orð." Post.5:20. En samt er Evrópa að hafna kristinni trú og falla fyrir áróðri svokallaðra vísinda (með dæmdum rangfærslum) og Islam!

Þetta varnarleysi sem varðveitir blekkinguna.  Það heimtar sannanir fyrir  upprisu Jesú. Krefst þess að Biblían sé lagfærð að ríkjandi viðhorfum og að kirkjan gangi af trúnni og hafni þeim kristna boðskap að Guð gerði mann og konu til þess að þau tvö yrðu einn maður. Fyrir því skal maðurinn yfirgefa föður og móður og búa saman við eiginkonu sína og þau tvö skulu verða einn maður. (Matt. 19:5). Á kristin kirkja að boða annað? Þjóðkirkja gæti gert það en þá er hún ekki lengur kristin heldur ríkisrekin sértrúarstofnun.

Svo auglýsir prófessor Svanur Kristjánsson eftir "hugrökkum prestum" sem tali gegn "gjafakvótakerfinu" en eiga þeir að tala máli Biblíunnar? Þó er prestuninn vígður og heitbundinn því að boða ómengað Guðs orð. Það er eina örugga "vírusvörnin" fyrir hausinn á okkur.

Þegar kemur að málefni Ísraels þá birtast greinar sem halda uppi vörnum fyrir Palestínumenn. Þeir skjóta 3500 eldflaugum á íbúa og óvarinn almenning  (ath. ekki bækistöðvar hersins) en læknirinn Sveinn Rúnar Hauksson segir að "árásarherinn sem ræðst þannig á íbúðarhverfi í þeim yfirlýsta tilgangi að fella vígamenn er að fremja stríðsglæpi". (Mbl.30.mars.´08)  Það er því stríðsglæpur Ísraelsmanna að fella vígamenn sem skjóta þúsundum eldflauga á almenning! En frelsisbarátta Palestínumanna ef þeir skjóta eldflaugum á íbúðarhverfi í þeim yfirlýsta tilgangi að fella Ísraelsmenn. Hér vantar lækninn vírusvarnir eða það sem venjulega er kallað sannleiksást.

Ég gæti haldið áfram í þessum dúr t.d. blekkinguna um Evrópuaðild, útrásina, vaxtaokrið og vanhæfni fjármagnseigenda sem hafa öruggan aðgang að almenningi til að bjarga fjárhagnum. Heitir það ekki að vera þræll ef "fjár-ans menni" geta endurfjármagnað sig með arði okkar og svita verkalýðsins?  Ég læt hér staðar numið að sinni.

Ætli maðurinn sé  gerður fyrir að trúa lyginni?

Biblían segir: "Þér eigið Djöfulinn að föður og viljið gjöra það sem faðir yðar girnist. Hann var manndrápari frá upphafi og aldrei í sannleikanum því í honum finnst enginn sannleikur." (Jóh.8: 44) 

Eina mikilvæga vírusvörn mannanna er að eignast Heilagan anda, anda sannleikans. 

 Kom þú Drottinn Jesús! Við þurfum hjálp.

kær kveðja

Snorri í Betel 

Yfir milljón tölvuóværur í umferð